عن اللجوء والهجرة والاندماج

عال…بحرة!

هي رجعتي من السيران.. مستغربين ما؟
لسا الدنيا الصبح…خليها لربكن…
صلينا الصبح بالهايم وطلعنا على شكل سيران جماعي مع عائلات الهايم وخالتي ام مرعي وام ياسمين وام كامل…وام رسمي .
حضرو مما لذ وطاب وصرلهن يومين عم يفرمو تبولة وسلطة ويحضرو أواتيل السيران…ومتل ما قال ..عمنا أبو رسمي أحلى شي باالسيران يلي فيه نسوان انه بحضروا كلشي انت بس بتقعد بتأركل…….
بس الاستاز وآئل قله لاتكون ذكوري… وتلاسنو شوي قبل ما نطلع…
واشترينا تكتين جماعي لكل المقاطعة…. وقررنا نروح عاالبحرة جو حلو. وقعدة صبابة… .. ومنه مناكل أكلة مقالي مدللة مع كم سن توم….
وقال الاستاذ وآئل الصحفي…. أحلى شي باالسيران انه متلقحين ومابدنا كمامات….
ونحنا باالقطار والولاد عم تنط عاالكراسي اجا الكونترول اخد كل الهويات تبعنا ورجعهن مع ورقة مكتوب عليها 90 يورو
……..
وحسب ما صفن اب حاتم زهايمر باالقصة قلي لان متلقحين وزعو علينا gutschein يلا نعمة رزقة واجت……الاااا زفاي غير مرعب هاالزلمة…
وصلنا وفردنا الاكل والدربكة واشتغل السيران….
وعمي اب رسمي النس شلح وطلع الكرش وهاالشعر الاسود وقعد على شط البحيرة وصار يتمردغ متل فرس النهر
حمدي البسكليتاتي وسعد الهزاز…. حميو افلللوو…. صار بدهن ينزلو يسبحو…. الآنسة يمنى تقلهن لاتنزلو هي المي تقيلة وباردة بلا ما تتصنجو وتغرقو….
قلها حمدي اي من يوم يومي بسبح بمسبح الفردوس باالقدم… هلق يلي بيعرف مسبح الفردوس بيعرف انه هنيك المي نصين (اصفر… واخضر) فطبيعي يفوش من كمية الأملاح والامونيا….
المهم عود رجاع خدني جيتك نزلو مافي خمس دقايق اشتغلت الولويل… النسوان عم يولولو عاالشط والشباب بلشو يغرقو… والألمان وقفو وصارو يقولو…. وووووو ماين كوود….
وانا صرت احمل قناني كبيرة الحشها لعندن بركدن بفوشو…
بس مافي امل.. قلت لكن بقرأ الفاتحة
وهن مافي غير عم يغرقو ويعملو بغبغببغغغغغغغغغغغ بغبغغغغغغغغغغغ…. غرررررررر هااااااء هاااااااااااااء….وانا عم اقرأ الفاتحة
وعلى ثواني اب حاتم زهايمر الوحش هو وسطام ابن الفرات.. هيك واشم على ايده.
…. وكاوى…. شلحو ونزلو متل الجيسكي (“متور البحر) صارو عندن…..ياشباب على ثواني كانو رح يموتو.. طالعنهن و… وانا فورا عملت لسعد الهزاز تنفس اصطناعي… صحيح اني آكل توم وخنقته بس فورا صحصح … بس يعني عاش…
والآنسة يمنى… مسكت اب حاتم وكاوى.وسطام وصارت اتضمهن وتقلهن انتو ابطال…… حتى الالمان قالو هيك….
بس خالتي ام مرعي نبهت بناتها ما يمشو مع يمنى قال يسارية….
وتخناق اب حاتم زهايمر وسعد وحمدي ليش ينزلو يسبحو.. الاستاز وآئل قله مرقها….
اب رسمي النس وقف مع اب حاتم… وانقسم السيران لتحالفات بين اليسار المتفهم… والوسط العنيد…..
وكانو رح يتخانقو…. لولا تدخل المدام سلمى هي اعقل وحدة باالهايم وقالتلهن… بليز خلينا نضب غراضنا ونرجع وبلا فدايح (فضايح)
قلها حمدي البسكاليتاتي… فدايح لكن اي لطيزي وبلا السيران…
الاستاز وآئل لطشه كف.. سعد وقف مع حمدي…
ام مرعي بلشت تولول.. بس سطام قلهن… يا شيبياب اذا ما توقفون هاالمهزلة ترى اشلح الكشاط العن ام السيران هسا..
وكاوى قله… لكن بدو ياها خلي سيران يفرت ما دل حدى ما تلع علينا شو هاد لو انشمنسا لو… ،
المهم عاالحارك ضبينا الغراض… ورجعنا وبالرجعة كمان طلع الكونترول وأخد الهويات ووزع علينا ورقة تبع ال 90 يورَو
…..
سؤال سريع معي ورقتين هلق كل وحدة ب 90 وين فيني اصرفهن بشركة ل db ولا وين… وشو لازم قلهن؟

علي عزت ميلوزوفيتش
Latest posts by علي عزت ميلوزوفيتش (see all)

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى